Poslovne vesti - Makedonija

Со добра идеја, знаење и упорност до сопствен бизнис

Информатичката технологија, маркетингот, менаџментот и изработувањето реклами, се најатрактивните сфери за младите кои одлучиле да почнат сопствен бизнис.

Но, освен идеја, порачуваат претприемачите, за успешна реализација на замисленото, неопходни се и знаење и многу упорност.

- Претприемништвото е движечка сила на секоја национална економија, обезбедува корист на општествено и на индивидуално ниво, промовирајќи одржлив раст и развој. Претприемачите не само што сами се вработуваат, туку истовремено креираат и работни места со што играат важна улога во економскиот и општествениот живот - рече министерот за економија Ваљон Сараќини, кој ја отвори Глобалната недела на претприемништвото. Според него, поттикнувањето на претприемништвото како способност на поединецот, е повеќе од потребно во Македонија особено сега, во услови кога светот се соочува со финансиска криза.

За Филип Арсов, претприемач, и еден од менторите на заинтересираните млади учесници во Глобалната недела, за почнување бизнис е најбитно да се има идеја, голема желба за некоја конкретна работа.

- Тоа е основното. Финансиите се резултат на реализираното потоа, оствареното, вид награда за вложениот труд. Претходно мора вредно и упорно да се работи. Секако, неопходно е и знаење, но клучно за успех е да се биде упорен. Погрешно е да се мисли дека најпрво се потребни финансии - изјави Арсов.

Глобалната недела на претприемништво е најголемиот светски настан за промоција на претприемништвото меѓу младите луѓе. Од 12 до 18 ноември милиони луѓе во светот учествуваат на настаните организирани по овој повод во стотици градови.